紅蘿蔔黑椒腸通＋杯新鮮檸蜜。
買咗幾個輪，裝係茶几底，個茶几即刻可以推黎推去。一路食野一路睇電視時，就推返係廳到，想對住電視做健身運動時，就推走個茶几，真方便。
5月14日，星期六，今日齊人食飯，就顯下身手啦。其實我唔識煮餸架，每次想整咩，都係上網搵教學，跟住煮，除咗太重味太咸，總體味道都ok架。
辣椒炆豬手，蠔油雞翼尖，西蘭花炒帶子，d帶子整完出黎，原來好鬼細粒。
講開帶子，就記起好鬼嬲既事，星期五，六，日係大昌食品VIP Day, 我星期五十點幾去幫襯，俾錢時個收銀都無計到vip價，我問佢時佢好似咩都唔知咁，要第二個人走埋黎入咗個code, 先平返100蚊有多。隔日，星期日十一點幾再去入貨，一到收銀結算時我就拎張vip卡出黎，佢完全無視我張vip卡，計哂錢之後又係無vip價，我又問佢，佢竟然用英文責備我唔一早攞張vip卡出黎，嬲到我呀。我錯就話抵俾你鬧啫，我無錯，你咁既態度，我唔同你死過呀，真心覺得營地街市大昌比連勝馬路大昌服務好超多超多，嬲死我啦。
下午茶時段，整個pancake玩下先，無咩材料，所以只係加得朱古力醬，味道不過不失啦。
5月15日，星期日，今日午餐正呀，煲咗個花膠響螺蘿蔔煲豬𦟌，補下膠質嘛。
呢兩日去咗來來，百佳都買唔到雪條模，夏天到啦，想diy健康雪條嘛，諗諗下Daiso可能有，走去睇睇，終於買到啦。返到屋企即試下，新手整個最簡單既牛奶雪條試下先，只需加牛奶，練奶，加熱，佢地溶為一體後，待涼放落雪條模，再放入冰格就ok啦。
依家出既雪條模，仲可以飲返溶咗既雪條汁，幾有創意。
5月16日，星期一，今日係佛誔節補假，所以澳門係公眾假期，我地今日去珠海考中國駕駛執照。搵咗間代辦公司，係中星商場，收費每人999人仔，全包宴，即係全部手續，體檢，午餐，專車接送等全包。我地約咗10：30去拱北等，先去體檢，再午餐，就坐車去啦，車程都大約一個鐘呀。因為係澳門假期既關係，超超超多人，我地兩點前到，辦到差不多三點半過d，先輪到我地考，好彩順利通知，我仲係97分添呀。
返到拱北好鬼肚餓，係地下商場醫埋肚先返屋企。
返到屋企試返噚晚整既牛奶雪條，好好味，好有滿足感呀。
沒有留言:
張貼留言